Paggamit og Pornograpiya

Ang paggamit og pornograpiya mahimong makapaadik, apan tambagi ang mga miyembro sa pagtutok sa ilang balaang pagkatawo isip mga anak nga lalaki ug mga anak nga babaye sa Dios imbis tawagon ang ilang kaugalingon pinaagi sa ilang mga binuhatan. Sa mainampoong paagi ikonsiderar ang pagpangutana og sama niini aron mas masabtan ang paggamit og pornograpiya sa miyembro ug malantaw ang iyang mga panginahanglan.

• Unsay epekto sa paggamit og pornograpiya sa imong kinabuhi?

• Kapila ka mogamit og pornograpiya?

• Unsay nakatabang sukad sa pagbuntog niini nga hagit?

• Giunsa nimo sa pagtuman ang mga baroganan sa ebanghelyo sa pagbuntog niini nga hagit?

Kon nakabantay ka nga adunay nanan-aw, namalit, o nag-apud-apod og pornograpiya nga naggamit og mga bata [child pornography], kontaka ang sibil nga mga awtoridad. Usa ka helpline [numero nga tawagan alang sa tabang] ang anaa para matawagan sa imong bishop kon magsulbad niini nga mga problema

Ang paggamit og pornograpiya sa kasagaran mas labaw pa kay sa moral nga kahuyang ug adunay daghang makaimpluwensya nga mga butang. Ang pagtabang sa indibidwal aron makaangkon og mas dakong panabot bahin sa mga butang nga makaimpluwensya sa paggamit og pornograpiya makalig-on sa iyang abilidad sa pagbuntog niini.

Lig-ona ang panabot sa indibidwal bahin sa doktrina nga makatabang kaniya sa pagbuntog sa paggamit og pornograpiya:

• Tabangi siya sa pagsabot sa tahas sa Manluluwas ug sa Iyang katakus sa pagtabang kanato pinaagi sa Iyang Pag-ula.

• Tabangi ang maong indibidwal sa pagkakita sa iyang tawhanong hiyas isip anak sa Dios ug pag-ila sa iyang kaugalingon nga mga kalig-on, mga talento, ug mga abilidad.

• Tabangi ang indibidwal sa pagsabot bahin sa kabubut-on ug sa iyang responsibilidad sa pagsulbad niini nga problema.

• Tabangi ang maong indibidwal sa pagsabot nga usa sa makadaot nga mga epekto sa paggamit og pornograpiya mao nga ang tiggamitan sa kasagaran magsugod sa pagtan-aw sa uban isip mga butang nga makatagbaw sa ilang mga tinguha imbis isip mga anak nga lalaki o mga anak nga babaye sa Dios.

• Hisgoti ang kalainan tali sa pagbati nga sad-an (“Ako nakahimo og ngil-ad nga butang”) ug kaulaw (“Ako ngil-ad nga tawo”), ug tabangi ang maong indibidwal sa pagsabot sa kaimportante sa katukma sa pagbati nga sad-an, samtang maglikay sa kaulaw.

• Dasiga ang maong miyembro sa pagpangita og impormasyon mahitungod sa maayo nga sekswalidad, tukma nga pagpahayag bahin sa sekwal, ug sa papel sa pakighilawas sulod sa mga utlanan nga giestablisar sa Dios.

Dasiga ang maong indibidwal sa paghimo og usa ka plano nga ihunong ang iyang paggamit og pornograpiya.

• Dapita ang maong indibidwal sa pagtinguha og iyang kaugalingon nga inspirasyon sa pagpalambo og plano nga mosalir.

• Dasiga ang maong indibidwal sa pagplano og mga paagi nga limitahan ang pag-access sa pornograpiya, sama sa pagbutang og mga filter sa internet ug pagtugot sa uban nga maka-access sa mga mobile device, mga computer ug password sa pagmonitor sa history sa iyang gipangtan-aw.

Dasiga ang maong indibidwal sa pag-ila sa pinaka komon nga mga sitwasyon nga makadugang sa tintasyon sa paggamit og pornograpiya ug kon unsaon sa paglikay niini.

• Tinoa ang “diin,” “kanus-a,” ug “giunsa” sa matag sitwasyon (ikonsiderar nga limitahan ang pag-access ug paggamit sa media, sama sa mga magasin, mga libro, telebisyon, mga sine, musika, internet, ug uban pa).

• Suhira ang mga pagbati nga nagpaluyo niana nga mga sitwasyon (sama pananglit sa pagbati og kapuol, pag-inusara, kasuko, kaluya, o kakapoy).

Dapita ang indibidwal sa paghisgot sa problema uban sa iyang kapikas o ginikanan.

• Dasiga ang indibidwal sa paghimo og plano sa pagpahiuli sa pagsalig niadtong kinsa mibati nga naluiban tungod sa paggamit og pornograpiya.

Dapita ang indibidwal sa regular nga pakigkita ngadto sa usa ka kasaligan nga tawo sa paghisgot sa kalamboan.

Ikonsiderar ang pagkonektar sa indibidwal ngadto sa mga grupo sa pagsuporta [support groups] o ngadto sa mga programa nga nagsuporta og mapuslanong moral nga mga sumbanan sa pagbuntog sa pornograpiya.

• Dapita ang miyembro sa pagtambong og usa ka lokal nga support group alang sa pagkaayo (“Maulian gikan sa Pagkaadik [Addiction Recovery]” nga seksyon sa ChurchofJesusChrist.org) kon anaa.

• Kon walay lokal nga programa nga nagsuporta [support program], ikonsiderar kon unsa pay ubang mga opsiyon nga posibling anaa, sama sa unsay anaa sa komunidad o pinaagi sa online nga mga grupo nga nagsuporta o mga programa.

Ang paggamit og pornograpiya adunay epekto sa kapikas ug sa ubang mga sakop sa pamilya. Samtang maningkamot ka sa pagsuporta sa kapikas o sa ubang mga sakop sa pamilya sa tiggamitan, paminawa ang ilang mga kahadlok ug mga kabalaka. Seguroha ang pagpakita og gugma ug empatiya sama sa buhaton sa Manluluwas. Dugang pa, seguroha ang paghatag og igong suporta ngadto sa usa ka kapikas kinsa tingali anaa sa pagsagubang. Tan-awa sa Suporta alang sa mga Kapikas sa Tiggamitan og Pornograpiya alang sa dugang nga impormasyon.

Dasiga ang kapikas o ang sakop sa pamilya sa pagtino sa epekto niini nga sitwasyon diha kaniya ug sa pagpangita og tabang kon gikinahanglan sa pagsulbad niana nga mga problema.

Tabangi ang sakop sa pamilya sa pagsabot kon sa unsang paagi ang Manluluwas makatabang, dili igsapayan kon ang iyang minahal mihunong ba sa pagtan-aw og pornograpiya (tan-awa sa Alma 7:11 ug sa Mateo 11:28–30).

Dapita ang pamilya sa pagtambong og usa ka grupo sa pagsuporta alang sa kapikas ug pamilya sa Simbahan o sa susamang grupo sa pagsuporta kon aduna. Tan-awa ang “Maulian gikan sa Pagkaadik [Addiction Recovery]” nga seksyon sa ChurchofJesusChrist.org alang sa mga oras sa grupo sa pagsuporta.

Dasiga ang sakop sa pamilya sa pagrebyo sa mga kapanguhaan alang sa mga kapikas ug mga sakop sa pamilya diha sa “Pornagrapiya [Addressing Pornography]” nga seksyon sa ChurchofJesusChrist.org.

Ikonsiderar ang paghangyo og mga lider sa ward o ubang kasaligan nga mga indibidwal sa paghatag og padayon nga suporta. Pangayo og pagtugot sa maong indibidwal sa dili pa hisgotan ang sitwasyon ngadto sa uban.

Pangita og kasaligan nga tawo nga mahimong suporta nga tawo [support person] alang sa miyembro, ug dasiga sila sa regular nga panagkita.

• Sa kasagaran, kini nga tawo kinahanglan nga usa ka tawo nga komportableng ikauban sa maong indibidwal kinsa adunay mga kalamposan sa pagbuntog sa pornograpiya o adunay maayong panabot bahin niini nga mga problema.

• Kini nga tawo pwede nga ang tigpangalagad [ministering] nga brother o sister.

Sa ubang mga sitwasyon, ang paggamit og pornograpiya sa maong indibidwal tingali magpadayon bisan sa iyang dako kaayong paningkamot ug sa tabang gikan sa uban sa pagbuntog sa paggamit og pornograpiya.

• Ikonsiderar ang pagpaadto sa miyembro ngadto sa usa ka propesyonal alang sa kahimsog sa pangisip kinsa mohatag og mga serbisyo nga nahiuyon sa mga baroganan sa ebanghelyo.

• Ang Family Services (kon anaa) tingali makatabang o makahatag og ideya alang sa lokal nga mga kapanguhaan, nga tingali maglakip sa mga programa sa pagpaayo o mga sentro, mga programa sa komunidad o mga grupo sa pagsuporta, ug mga ahensya sa gobyerno.