Panagbangi sa Kaminyoon

Ang pagtabang sa matag paris aron mobati nga gipaminaw ug gisabot tingali sama ra ka importante sa bisan unsa nga tabang nga imong mahatag. Samtang istoryahan nimo ang mga kapikas, siguroa ang pagpakita og gugma ug empatiya sama sa buhaton sa Manluluwas. Sa mainampoong paagi ikonsiderar ang pagpangutana sa matag kapikas sama sa mga mosunod pinaagi sa mabination ug mahigugmaong paagi aron matabangan ka nga mas makabantay ug makasabot sa sitwasyon ug makalantaw sa ilang panginahanglan. Gahini og panahon ang yano nga pagpaminaw.

• Unsa may imong nasinati karon?

• Unsa ang imong gikabalak-an kaayo mahitungod sa imong kaminyoon?

• Unsay imong gibati mahitungod sa imong mga pakigsaad sa kaminyoon?

• Unsa ikaw ka bukas o ikaw ba andam na nga hisgutan kini nga problema uban sa imong kapikas?

• Ikaw ba ang matang sa tawo ug kapikas nga maoy imong gusto?

• Unsay imong gihimo sa pagpalambo sa imong relasyon uban sa imong Langitnong Amahan?

• Sa unsa nga paagi nga ikaw makatampo sa panagbangi sa inyong relasyon?

• Unsa nga mga baruganan sa ebanghelyo ang pwedeng makahatag og mga kasulbaran sa problema?

• Unsay andam nimong buhaton aron makatabang sa pagsulbad sa problema?

• Unsay imong gikinahanglan aron mopasaylo o mapasaylo sa inyong relasyon?

• Unsa nga mga tinubdan sa suporta o ubang mga kapanguhaan ang anaa kanimo aron matabangan ka?

• Unsay imong mahimo aron makadangop ngadto sa Manluluwas nga si Jesukristo ug makatagamtam sa gahom sa Iyang grasya?

Sa imong pagtabang sa magtiayon, siguroa nga nakasabut sila sa ilang responsibilidad sa pagpangita og mga kasulbaran sa ilang mga problema. Sa tukmang paagi ipadayag ang imong gugma ug pagpakabana sa magtiayon samtang magkonsiderar ka sa pipila sa mosunod nga mga sugyot.

Ipasabot og maayo ang indibidwal nga responsibilidad ug tulubagon sa matag kapikas diha sa relasyon sa kaminyoon. Ang mga kapikas kinsa matinuorong motimbang-timbang sa ilang kaugalingong kinaiya ug diha-diha mobuhat sa gikinahanglang mga lakang sa paghinulsol ug pag-uswag makasinati og pagkaayo sa ilang mga kaminyoon.

• Tabangi ang matag kapikas sa paghibalo nga walay bisan usa nga makausab og laing tawo, apan uban sa hugot nga pagtuo, paningkamot, ug tabang sa Dios, ang matag tawo makasinati sa iyang kaugalingong kausaban sa kasingkasing.

  Awhaga ang matag kapikas sa paglikay nga ipugos ang iyang kaugalingon nga paagi, kon hisgutan ang moral nga kahawod, o pagtinguha og panimalos.

  Tabangi ang matag kapikas sa paghunahuna kon unsa ang gibati sa usa diha sa relasyon ug trabahoa ang pag-ugmad og empatiya. Dapita sila sa paghisgot sa ilang mga panglimbasog.

Tabangi ang magtiayon sa paghunahuna kon unsa kaha ang problema sa laing kapikas nga kinahanglang hikalimtan na.

Siguroa nga ang matag kapikas mobati nga luwas sa dayag nga paghisgot sa panagbangi sa ilang kaminyoon. Usahay ang usa ka kapikas tingali mopalayo kay sa direktang moatubang tungod kay wala siya mobati nga luwas sa pisikal ug emosyonal nga paagi.

• Tabangi ang matag kapikas sa pagsabot nga siya makadawat og inspirasyon sa paghimo og klarong mga utlanan diha sa relasyon sa kaminyoon ug sa panimalay.

• Klaroha nga ang matag kapikas responsable lamang sa iyang kaugalingong kinaiya ug nga siya dili angayang mag-antus sa mapang-abuso nga kinaiya.

• Kon ikaw adunay mahibaloan nga bisan unsang pag-abuso, kontaka ang sibil nga mga awtoridad. Usa ka help line [numero nga tawagan alang sa tabang] anaa usab alang sa bishop. Dangop ngadto sa Pag-abuso (Tabang alang sa Biktima) nga kapanguhaan ug ang Pag-abuso (Tabang alang sa Nakasala) nga kapanguhaan.

Kon ang managtiayon nagkinahanglan og dugang nga tabang, awhaga sila sa dungan nga pagdawat og propesyonal nga tabang kutob sa mahimo aron malikayan ang bisan unsang dili-pagsinabtanay tali kanila ug aron maawhag ang hingpit nga kamatinuoron.

Ang panagbangi sa kaminyoon makaapekto sa tanang sakop sa pamilya. Tinoa ang epekto sa panagbangi diha sa ubang mga sakop sa pamilya, ug hisgoti ang ubang may kalabotan nga problema nga maoy hinungdan sa panagsungi.

Suportahi ang maayong mga sundanan sa komunikasyon (tan-awa sa “Communicating with Love,” Strengthening Marriage: Resource Guide for Couples [2006], 4, 7).

• Tabangi ang magtiayon sa pag-ila ug pag-usab sa negatibo ug makadaot nga mga sundanan sa komunikasyon, sama sa pagpanaway o pagtratar sa usag usa dala ang pagtamay.

• Awhaga ang mga kapikas sa pagpasaylo dayon ug sa pagtinguha nga mopasaylo sa usag usa.

• Tabangi ang mga magtiayon sa paggamit og “ako” diha sa mga mensahe kay sa mga pulong nga “ikaw” diha sa mga mensahe. Sama pananglit, “Ako mibati og walay kasiguroan ug wala higugmaa kon ako walay madunggan gikan nimo” imbis nga “Ikaw wala mahigugma nako.” O “Ako mibati nga kanunay akong pakyas sa unsay imong gilauman” imbis “Ikaw mipakita ngari nako nga dili gyud ko makabuhat og eksakto.”

Tambagi ang mga bana ug mga asawa sa pagtratar sa usag usa isip magkatimbang nga kaparis.

• Awhaga ang mga magtiayon sa pagmatinuoron, bukas, ug pagmatinahuron sa usag usa.

• Awhaga ang mga magtiayon sa pagpaambit ug paghatag og access sa importante ug tukma nga impormasyon.

• Awhaga ang mga magtiayon sa paghimo og hiniusang mga desisyon isip usa ka magtiayon.

• Awhaga ang mga magtiayon sa paglikay sa kultural o historikal nga nabatasan nga buhat diin ang usa ka kapikas modominar o motratar sa usa isip ubos nga kaparis [second-class partner] sa kaminyoon. Kini nga mga nabatasan nga buhat nahisukwahi sa mga baruganan sa ebanghelyo ug kinahanglan nga ang mga magtiayon moalili niini og eksaktong mga sundanan sa kinaiya.

Tabangi ang magtiayon sa pagtimbang-timbang sa ilang mga sundanan sa pagtuo, mga kinutoban [boundary] sa pamilya ug sa ubang mga nabatasan nga buhat.

• Hisgoti ang mga pagtambong sa pamilya og mga miting sa Simbahan, sinemana nga family home evening, personal ug pamilya nga pag-ampo ug pagtuon sa kasulatan, pagpangaon isip pamilya.

• Hisgoti kon sa unsang paagi ang paggamit sa kapikas sa media ug mga electronic nga device nakaapekto sa ilang relasyon.

• Tambagi ang managtiayon sa pagtakda og mga kinutoban sa media, social media, ug paggamit og mga electronic nga device. Awhaga ang managtiayon sa paghinatagay sa ilang mga password, paghibaloay sa ilang paggamit sa social media, ug paglikay sa bisan unsang sekreto nga mga kasinatian sa internet.

• Awhaga ang matag kapikas sa paglikay nga mokonektar sa uban sa mga paagi nga mabudhian ang sagradong pagsalig sa iyang kaparis o posibling pagka-dili angay.

Kon adunay mga anak sa pamilya, tingali mobati sila og kaluya ug kabalaka mahitungod sa relasyon sa mga ginikanan. Tabangi sila sa mga panglimbasog nga ilang atubangon.

• Tabangi ang mga magtiayon sa pagsabot sa epekto sa mabingkilon nga mga pagsumpaki ug panagsungi ngadto sa ilang mga anak.

• Awhaga ang magtiayon sa pag-angkon sa tukmang paagi ngadto sa ilang mga anak sa bisan unsang kasungian sa kaminyoon; kini makatabang sa pagsiguro nga ang ilang mga anak dili mapasagdan sa pagsagubang sa mga epekto sa kasungian nga sila ra.

• Dapita ang mga magtiayon sa paghisgot uban sa ilang mga anak sa tinagsa-tagsa, nga tukma sa ilang pangidaron, bahin sa unsay gihimo sa magtiayon sa pagsulbad sa panagbangi.

• Kon ikaw adunay nahibaloan nga bisan unsang pag-abuso sa bata o pagpangdapat, kontaka diha dayon ang sibil nga mga awtoridad. Ang mga bishop usab adunay help line [numero nga tawagan alang sa tabang] niini nga mga sitwasyon.

Dapita ang managtiayon sa pagpapangita og anaa nang daan nga mga kapanguhaan nga makatabang nila sa pagpalambo sa ilang relasyon sa usag usa ug sa ilang mga anak.

• Dapita ang magtiayon sa paghimo og lista sa mga talento, mga kahanas, mga relasyon, mga kapanguhaan, mga sakop sa pamilya, ug ubang kapanguhaan nga magamit sa magtiayon sa pagsulbad sa panagbangi sa kaminyoon.

• Tambagi ang magtiayon sa paglikay sa pagpangita og mga kapanguhaan o mga tawo nga mopabor sa pikas ra nga habig o usa ka partikular nga panaglalis.

Human makuha ang pagtugot sa magtiayon nga ihisgot ang sitwasyon ngadto sa uban, ikonsiderar ang paghangyo sa mga lider sa ward o sa ubang tawo nga kasaligan sa paghatag og padayon nga suporta, paggiya, ug tabang.

Ikonsiderar ang pagpahimutang og dugang nga mga klase nga dili labot sa mga miting sa Simbahan o pagsangon og usa ka mentor nga makigkita sa magtiayon sa tinagsa-tagsa nga paagi pinaagi sa paggamit sa Strengthening Marriage [Pagpalig-on sa Kaminyoon] ug sa Strengthening the Family [Pagpalig-on sa Pamilya] nga mga kurso ug sa mga materyal sa kurso.

Ubos sa direksyon sa bishop, pangita og usa ka kasaligan nga magtiayon kinsa pwedeng himoon nga mentor niini nga magtiayon ug maoy ilang suporta. Sa kasagaran, kini nga magtiayon nakaagi usab og susamang hagit, apan si bisan kinsa nga magtiayon nga hingkod sa espiritwal nga paagi nga may kamanggiloy-on pwedeng makahatag sa mapinanggaon nga suporta.

Ikonsiderar ang pagpadangop sa magtiayon ngadto sa propesyonal nga tabang og pagpanambag. Pangita og lokal nga mga kapanguhaan nga naghatag og mga serbisyo nga uyon sa mga baruganan sa ebanghelyo.

• Ang Family Services (kon anaa) makahimo sa paghatag og konsultasyon alang sa mga lider ug makatanyag og mga sugyot mahitungod sa mga kapanguhaan sa inyong komunidad.