Suporta alang sa mga Tig-atiman

Ang tig-atiman usa ka tawo nga mohatag og regular nga pag-atiman sa tawo nga dili makahimo sa pagbuhat sa pipila o sa tanan nga kaugalingon nilang panginahanglan. Sa kasagaran ang tawo nga atimanon usa ka sakop sa pamilya nga nagpuyo nga dunay pisikal o kakulian sa pangisip, nagpadayon nga balatian, o mga epekto sa pangidaron. Ang ipasalig nga oras nga gikinahanglan sa pag-atiman sa ingon niana nga mga indibidwal pwedeng pipila ka oras kada semana hangtud 24 ka oras nga pag-atiman.

Ang mga tig-atiman sa kasagaran nagkinahangan og pagbalanse sa trabaho, simbahan, ug ubang mga responsibilidad sa pamilya samtang sa samang higayon maningkamot sa paghatag og indibidwal nga pag-atiman sa usa ka minahal. Samtang ang pag-atiman sa kasagaran magantihon kaayo ug makalipay nga kasinatian, ang mga panginahanglan sa padayong pag-atiman maghatag usab og kabalaka, kabudlay, pinansyal nga kaluya, kabalaka, ug kakapoy.

Ang mga tig-atiman may mga panginahanglan usab nga dili makita sa uban, ug pwedeng magpanuko sila sa pagpangayo og tabang. Ang mga tig-atiman pwedeng makabaton og mas taas nga risgo sa depresyon nga may kalabutan sa kaluya, kabalaka, abuso sa makaadik nga sangkap, o mga problema sa pisikal nga kahimsog. Sila tingali makasinati usab og kasubo, kaligut-got, o kasuko gumikan sa pagkawala sa ilang mga paglaom ug mga gipaabut. Ang inadlaw-adlaw nilang estilo sa pagpakabuhi, kagawasan sa paghimo sa mga butang nga ilang gusto, ug mga tumong sa umaabut ang tanan tingali lahi gikan sa una nilang gilauman.

Magtinguha sa Pagsabot

Samtang makig-istorya ka sa mga tig-atiman, siguroa ang pagpakita og gugma ug empatiya sama sa buhaton sa Manluluwas. Tungod kay ang matag sitwasyon managlahi ug ang mga kahimtang sa matag tawo lain-lain, pagmainampoon sa pagkonsiderar sa pagpangutana og mga ingon niini pinaagi sa mabination ug mapinanggaon nga kinaiya aron matabangan ka nga mas makasabot sa mga kahimtang sa tig-atiman ug makahibalo sa iyang mga panginahanglan.

Unsa man ang kasamtangan nga sitwasyon, ug unsa man ang imong mga responsibilidad?
Unsa ang pinakalisud nga mga aspeto mahitungod sa imong gisagubang?
Sa unsang paagi ang pagka tig-atiman nakaapekto sa imong pamilya sa (kahimsog sa panglawas, mga kabalaka sa pinansyal, mga buluhaton, mga responsibilidad, ug uban pa)?
Unsa nga mga hagit ang imong nasinati sa imong relasyon ngadto sa giatiman?
May kalagmitan bang momaayo ang sitwasyon, padayon bang mao ra gihapon, o mas mograbe sa kadugayan?
Unsa nga matang sa tabang sa pag-atiman ang imong kasamtangan nga nadawat (gikan sa ubang sakop sa pamilya, sa tigpangalagad nga mga brother ug sister, mga kapanguhaan sa komunidad, o mga tigsangkap og mga pag-atiman sa kahimsog [healthcare providers])?
Unsa nga mga tahas ug mga responsibilidad diha nimo ug sa ubang sakop sa pamilya ang wala makompleto, tungod sa kakulang sa oras o abilidad?
Unsay imong gihimo sa pag-atiman sa imong kaugalingon (nutrisyon, pagkatulog, pag-ehersisyo, pabalik-balik nga medikal nga pag-atiman)?
Unsa pa ang gusto nimong ipaambit kanako mahitungod sa imong sitwasyon?

Tabangi ang Indibidwal

Samtang magtabang ka sa miyembro sa iyang sitwasyon, ikonsiderar ang paggamit sa pipila ka mosunod nga mga sugyot.

Tabangi ang tig-atiman nga makasabot sa makapahimo ug makatubos nga gahum sa Manluluwas nga si Jesukristo (tan-awa sa Alma 7:11–12; Doktrina ug mga Pakigsaad 88:6; Mosiah 24:13–15).

Tinoa kon unsaon sa pagtabang ang tig-atiman aron magpadayong konektado sa ubang mga miyembro sa ward ug mga serbisyo sa pagsimba.

Kon ang tig-atiman ug ang giatiman mobati nga sila usa ka palas-anon sa ward, tabangi sila sa pagsabot nga gitagaan sila og bili ug nga daghang miyembro sa ward ang malipay nga moserbisyo kanila.
Isiguro nga ang sakramento mahatag diha sa panimalay, kon gikinahanglan.
Tinoa kon ang tig-atiman nagkinahanglan ba og tabang aron makatambong sa Simbahan, sa templo, o ubang kalihokan.
Ipaambit ngadto sa tig-atiman kon sa unsang paagi ang iyang ehemplo ug mga kasinatian nakatabang sa ubang mga miyembro sa ward.
Ikonsiderar ang paghatag sa tig-atiman og tukmang mga oportunidad sa pagserbisyo nga dili madugangan ang ilang palas-anon.

Bisitaha ang tig-atiman ug ang giatiman ug ipahayag ang imong gugma ug kabalaka alang sa tanan nga nahilakip.

Planoha ang mga pagbisita sa balay aron mas masabtan ang sitwasyon.
Ihatag ang pagdasig ug tabangi ang tig-atiman sa pagsabot nga wala siya mag-inusara.
Tabangi nga maplano ang paghatag og panalangin sa pagkapari kon gihangyo o kon nadasig sa paghimo niini.
Hisgoti kon unsay mga plano sa tig-atiman alang sa pagpasibo sa pagpang-atiman o unsay buhaton kon magkagrabe ang sitwasyon, ug kon sa unsang paagi ang ward makatabang.

Ilha ang anaa nga mga kapanguhaan nga maduolan sa tig-atiman alang sa tabang

Paghimo og lista sa mga talento, mga kahanas, ug mga kapanguhaan sa mga sakop sa pamilya ug mga higala kinsa makahatag sa gikinahanglang tabang ug paghimo og plano aron magamit kini nga mga kapanguhaan.
Tabangi nga makakita ang tig-atiman og mga oportunidad para sa personal nga oras. Hunahunaa ang espiritwal ug personal nga mga panginahanglan ingon man ang mga oportunidad nga makalingaw-lingaw.

Ilha ang dugang pa nga gikinahanglang mga kapanguhaan, sama sa:

Pinansyal nga tabang
Insurance
Tabang ug suporta gikan sa ubang mga sakop sa pamilya
Suporta alang sa pisikal ug kahimsog sa pangisip nga kaayohan
Panarbaho
Transportasyon
Magamit ug makaabag nga teknolohiya o ekipo

Suportahi ang Pamilya

Kon duna pay ubang mga sakop sa pamilya sa panimalay, pwede nilang tabangan ang tig-atiman. Tinoa ang epekto nga mahimo niini ngadto sa tig-atiman ug sa giatiman, ingon man usab sa kapikas, mga anak, o sa ubang sakop sa pamilya ug atimana kana nga mga problema.

Tabangi ang mga anak nga makasabot bahin sa pagpuli-puli nga mga tahas ug sa mga panginahanglan sa panimalay.

Pwedeng makita sa mga anak ug mga tin-edyer nga sila dunay mas dakong responsibilidad kon ang usa ka ginikanan o igsoon usa ka tig-atiman o giatiman (sama pananglit, mga responsibilidad sa panimalay, sa tugkaran, o pagmentinar sa sakyanan).
Ang mga ginikanan nga mga tig-atiman o giatiman posibling dili makagahin og dakong panahon sa ilang mga anak kutob sa ilang gusto.

Paapila ang mga bata sa mga kalihokan sa ubang pamilya sa ward.

Dapita ang mga pamilya sa ward sa pagbisita sa panimalay, ug awhaga sila sa pag-apil sa mga kalihokan sa pamilya, sama sa family home evening.

Ang tawo nga giatiman mobati nga daw sila palas-anon sa mga tig-atiman ug gani mobati nga lisud pangitaon ang kahulugan kon grabe ka limitado ang iyang mga abilidad. Ikonsiderar ang mga paagi sa pagtabang sa maong indibidwal aron makita ang katuyoan ug katumanan.

Depende sa sirkumstansya, tabangi nga makita ug maapil siya sa makahuluganong mga kalihokan (sama sa pagserbisyo, paglingaw-lingaw, panag-uban sa pamilya, personal nga mga proyekto ug ganahang buhaton, ug uban pa).
Ikonsiderar ang mga oportunidad nga makaserbisyo sa Simbahan nga diha ra sa panimalay, sama sa FamilySearch Indexing o ubang anaa sa online nga mga oportunidad.

Gamita ang mga Kapanguhaan sa Ward ug Stake

Ang mga lider sa ward o ubang indibidwal nga kasaligan makahatag og padayong suporta, giya, ug tabang. Pangayoa ang pagtugot sa tig-atiman sa dili pa mohisgot sa sitwasyon ngadto sa uban.

Ang mga lider pweding mokonsiderar sa paghisgot sa sitwasyon diha sa ward council sa pagtino kon sa unsang paagi ang ward makasuporta sa tig-atiman ug sa tawo nga giatiman.

Ang bishop mahimong modapit sa kapangulohan sa Relief Society nga makigtambayayong sa tig-atiman aron masusi og dugang ang sitwasyon ug matino unsaon nga maatiman ang mga panginahanglan.
Ang presidente sa kurom sa mga elder ug presidente sa Relief Society kinahanglang mokonsiderar sa pag-assign og mapasaligon nga tigpangalagad nga mga brother ug sister ngadto sa pamilya.
Tabangi ang tig-atiman sa pagpangita og usa ka tawo nga kasaligan kinsa mahimo nga padayong mosuporta kaniya. Pwede nga usa ka tigpangalagad nga brother o sister, o laing miyembro sa ward.

Pangita og mga paagi nga ang mga miyembro sa ward mohatag og tabang.

Pangita og miyembro kinsa makabisita sa panimalay aron mahupay ang pag-inusara.
Paapila ang mga batan-on o ang uban sa mga proyekto sa pagserbisyo aron sa pagtabang sa pamilya.
Pangita og mga paagi nga ang mga miyembro sa ward makahatag og regular nga paghupay pinaagi sa pagtabang sa giatiman samtang ang tig-atiman nagtambong og grupo sa pagsuporta [support group], nag-atiman sa espiritwal o personal nga mga panginahanglan, o mokuha og makahupay nga tabang sa uban.

Pangita og lokal nga mga organisasyon ug mga kapanguhaan ug awhaga ang tig-atiman sa paggamit niini. Ang mga kapanguhaan maglakip sa:

Mga propesyunal nga tigtambag
Mga lokal ug nasyonal nga grupo sa pagsuporta [support group] alang sa mga tig-atiman (sa personal o sa online)
Mga organisasyon sa gobyerno ug sa pribado
Mga non-governmental organization (NGO)