Pagkaadik

Ang paghisgot bahin sa mga pagkaadik posibling lisod, ug ang mga tawo tingali mobati nga dali silang mabiktima o maulawan. Samtang makig-istorya ka sa maong mga indibidwal, pasalamati sila sa ilang kaisog sa pagpangita og tabang. Tinguhaa ang pagpakita og gugma ug empatiya sama sa buhaton sa Manluluwas.

Sa mainampoong paagi ikonsiderar ang pagpangutana sa sama niini o pakig-istorya mahitungod sa sitwasyon aron matabangan ka nga mas makasabot sa pagkaadik sa usa ka tawo ug mahibalo sa iyang mga panginahanglan.

• Sultihi ko mahitungod sa unsay nanghitabo.

• Sa unsang paagi nagsugod kini nga problema?

• Unsa ang pinakadakong hagit sa pagbuntog niini nga adiksyon?

• Unsa nga mga paningkamot ang imong gihimo sa pagbuntog niini nga hagit? Unsa ang nakatabang sukad?

• Sa unsang paagi kaha ang Ginoo makatabang kanimo nga mabuntog ang imong pagkaadik?

• Si kinsa pa ang nahibalo bahin niini ug unsa nga matang sa suporta ang ilang gihatag diha kanimo?

Samtang tabangan nimo ang maong tawo sa pagbuntog niini nga hagit, ikonsiderar ang paggamit og pipila sa mosunod nga mga sugyot. Siguroa ang kanunay nga pagpakita og gugma ug pagpangga samtang magtinabangay kamo.

Tabangi ang maong tawo sa paghimo og plano sa paglikay o pagsulbad sa mga sitwasyon diin siya dali ra nga matintal. Ribyuha kanunay ang plano.

Tudloi ang maong tawo sa doktrina mahitungod sa kabubut-on ug tabangi siya sa pagsabot nga ang mga pagkaadik dili makausab sa atong mahangturon nga pagkatawo.

• Itudlo nga ang bisan unsa nga pagkaadik mabuntog pinaagi sa Manluluwas nga si Jesukristo tungod sa Iyang Pag-ula.

• Tabangi ang maong tawo sa pagsabot kon sa unsang paagi ang Manluluwas makahimo sa usa ka tawo sa pagbuntog sa mga hagit.

• Tabangi ang maong tawo sa pagsabot kon sa unsang paagi ang Manluluwas makahimo sa usa ka tawo sa pagbuntog sa mga hagit.

• Tabangi ang maong tawo sa pagkakita sa iyang pagkatawo isip anak sa Dios ug sa pagkaila sa iyang kaugalingong indibidwal nga mga kalig-on, mga talento, ug mga abilidad.

Tabangi ang maong tawo sa pagtino sa pinaka komon nga mga sitwasyon nga makadugang sa tintasyon (sama sa mga sitwasyon nga makaagni og mga hunahuna ug mga paghidlaw nga may kalambigitan sa pagkaadik).

• Suhira ang mga pagbati nga nagpaluyo niana nga mga sitwasyon (sama pananglit, mga pagbati sa kapuol, pag-inusara, kasuko, kaluya, o kakapoy).

• Hunahunaa kon diin, kanus-a ug sa unsang paagi nahitabo ang matag malagmit makatintal nga sitwasyon.

Dapita ang maong miyembro sa pagtambong sa usa ka lokal nga Programa aron Maulian gikan sa Pagkaadik (PMP) nga support group o sa ubang 12 ka lakang nga miting alang sa pagkaayo gikan sa pagkaadik.

Awhaga ang maong tawo sa pagtug-an gayud ug sa dili pagbakak mahitungod sa iyang pagkaadik ngadto sa iyang kapikas, mga ginikanan, o ubang mga sakop sa pamilya.

Tabangi ang maong miyembro sa pagpangita og tabang gikan sa tawo nga iyang kasaligan.

Ang pagkaadik makaapekto sa mga sakop sa pamilya ingon man sa indibidwal. Samtang makig-istorya ka sa naapektohan nga mga sakop sa pamilya, siguroa ang pagpakita og gugma ug empatiya sama sa buhaton sa Manluluwas. Tinoa ang nahimong epekto diha sa kapikas sa maong indibidwal o pamilya ug sulbara kana nga mga problema.

Sugdi pinaagi sa pagtabang sa mga sakop sa pamilya nga mobati nga gihigugma ug gipaminaw. Pwede kang moingon nga, “Usa kini ka sitwasyon nga lisod latason. Unsa man ang imong gibati?”

Suhira ang bisan unsang posible nga kahadlok, kabalaka, pagbasol sa kaugalingon, o kakulang sa pagsalig.

Dapita ang kapikas o ang mga sakop sa pamilya sa pagtuon sa mga baruganan diha sa Suporta nga Giya: Tabang alang sa mga Kapikas ug Pamilya Niadtong mga Nagpaayo.

Dapita ang mga sakop sa pamilya sa pagtambong sa Programa aron Maulian gikan sa Pagkaadik sa kapikas ug pamilya nga grupo sa pagsuporta [support group] o sa susama nga grupo sa pagsuporta.

Tabangi ang mga sakop sa pamilya sa pagsabot kon sa unsang paagi ang Manluluwas makatabang kanila nga mamaayo sa personal nga paagi, sa walay paghunahuna kon nabuntog ba sa ilang minahal ang pagkaadik (tan-awa sa Alma 7:11; Mateo 11:28–30).

Ikonsiderar ang paghangyo sa mga lider sa ward o uban nga kasaligan nga mga indibidwal sa paghatag og padayong suporta, giya, ug tabang. Pangayo og pagtugot sa maong indibidwal sa dili pa hisgutan ang sitwasyon ngadto sa uban.

Ang bishop tingali makigtambayayong sa maong indibidwal sa pagpangita og usa ka kasaligan nga tawo nga mahimong mentor alang sa maong indibidwal ug dayon moawhag kanilang duha sa pagtakda og mga tumong ug sa paghimo og plano alang sa pagtinabangay.

• Ang mentor kinahanglan nga usa ka tawo nga komportabling ikauban sa maong tawo ug sa kasagaran usa ka tawo nga nakabuntog sa sama nga problema.

• Kon ang maong indibidwal usa ka menor de edad, ang bishop kinahanglan nga mopaapil sa mga ginikanan kon mangita og usa ka mentor.

Bisitaha ang Programa aron Maulian gikan sa Pagkaadik nga website (addictionrecovery.ChurchofJesusChrist.org) sa pagpangita og usa ka lokal nga miting alang sa maong tawo nga katambongan. Kon wala kini, ikonsiderar ang pagkontak sa presidente sa stake sa paghangyo nga makasugod og usa niini.

Pangita og lokal nga mga kapanguhaan nga naghatag og mga serbisyo nga uyon sa mga baruganan sa ebanghelyo.

• Ang mga kapanguhaan tingali maglakip sa propesyonal nga mga magtatambag, mga programa sa pagpanambal, ug mga ahensya sa gobyerno.

• Ang maong tawo tingali nagkinahanglan usab og dugang nga medikal nga tabang. Ikonsiderar ang pagkuha og propesyonal nga pagpahiling sa pagtino sa tukmang lebel sa pag-atiman.