Pag-abuso (Tabang alang sa Biktima)

Ang mga Bishop, mga presidente sa branch, ug mga presidente sa stake kinahanglan nga manawag dihadiha dayon sa eklesyastikal nga help line [numero nga tawagan alang sa tabang] sa Simbahan sa matag higayon nga may nahibaloan sila bahin sa abuso. Kini nga kapanguhaan naghatag og ayuda sa pagtabang sa mga biktima ug sa paghimo sa mga rekisito sa pag-report. Adto sa Mga Numero sa Help Line alang sa tabang sa numero sa help line ug sa dugang nga impormasyon.

Kinahanglan gayud nga walay lider nga mobaliwala sa usa ka report sa pag-abuso o motambag og usa ka indibidwal sa dili pag-report sa kriminal nga kalihokan.

Ang pag-abuso mao ang pagmaltrato o pagpasagad sa uban (sama sa anak o kapikas, sa mga tigulang, o sa mga baldado) sa paagi nga makahatag og pisikal, emosyonal, o sekswal nga kadaot. Ang posisyon sa Simbahan mao nga ang pag-abuso dili mahimong pasagdan ra sa bisan unsang matang ug nga kadtong mang-abuso manubag sa atubangan sa Dios. Makombikto man o dili ang usa ka tawo sa pag-abuso, ang mga nakasala ipaubos sa pagdisiplina sa Simbahan ug posibling matangtang ang ilang pagkamiyembro sa Simbahan (tan-awa sa Mateo 18:6; Marcos 9:42; Lucas 17:2).

Ang unang mga responsibilidad sa Simbahan sa mga kaso sa pang-abuso, mao 1) ang pagtabang, pinaagi sa mabination ug sensitibo nga paagi, niadtong giabusohan ug 2) ang pagpanalipod niadtong mahimong biktima sa umaabut nga abuso. Samtang ang pipila ka matang sa abuso moresulta sa pisikal nga kadaot, ang tanang matang sa abuso makaapekto sa hunahuna ug espiritu. Ang abuso sa kasagaran moguba sa pagtuo ug maoy hinungdan sa kalibog, pagduha-duha, walay pagsalig, pagbati nga sad-an ug kahadlok sa biktima. Tan-awa sa “Pag-ila sa mga Timailhan sa Pagpang-abuso” ug “Unsa ang mga timailhan nga ang usa ka tawo giabuso”

Tabangi ang biktima nga makasabut nga siya dili responsable sa mga lihok sa nag-abuso ug wala gipaabot nga molahutay sa pag-antos sa mapang-abuso nga kinaiya.

Hibaloi nga ang mga tig-abuso posibling maliputon, mokontrolar, ug malimbongon, mao nga ang ilang bersyon sa mga panghitabo mahimong magkalahi gikan sa biktima. Sa tanang sitwasyon, hunahunaa labaw sa tanan ang kasiguroan ug proteksyon sa biktima.

Ang mga lider sa Simbahan wala gipaabut ni giawhag nga modayagnos o mohatag og pagtambal niadtong mga nakigbisog sa mga isyu sa kahimsog sa pangisip nga may kalabotan sa abuso. Kon gikinahanglan, awhaga ang tawo sa pagkonsiderar nga mangayo og propesyonal nga tabang. Ang Family Services (kon anaa) makahimo sa paghatag og konsultasyon ug makatanyag og impormasyon ngadto sa mga lider mahitungod sa mga kapanguhaan diha sa ilang mga komunidad.

Samtang basahon nimo ang mosunod nga impormasyon, tinguhaa ang inspirasyon sa pagpahaom niini nga mga sugyot ngadto sa sitwasyon sa biktima, nga pwedeng mausab kon ang biktima usa ka kapikas, bata, hamtong nga ginikanan, o tawo nga may kakulangan.

Ang pagtabang sa biktima nga mobati nga gipaminaw ug gisabot tingali sama ka importante sa bisan unsa nga tambag nga imong mahatag. Samtang istoryahan nimo ang mga biktima, tinguhaa ang pagpakita og gugma ug empatiya sama sa buhaton sa Manluluwas. Ang paghisgot mahitungod sa abuso nagkinahanglan og dakong kaisog sa habig sa biktima, ug siya tingali magkinahanglan og kapaniguroan ug kahupayan.

Pabilin nga kalma ug pangandam nga mogahin og panahon sa pagpaminaw sa mga kahadlok, mga pagduha-duha, ug mga kabalaka sa biktima. Sa mainampoong paagi ikonsiderar ang pagpangutana sa ingon niini pinaagi sa mabination ug sensitibong paagi aron matabangan ka nga makasabot og maayo sa sitwasyon sa biktima ug makakita sa iyang mga gikinahanglan. Siguroha ang pagtugot sa biktima sa paghulagway sa sitwasyon sa iyang kaugalingong mga pulong kay sa magsukit-sukit kaniya.

• Unsay nahitabo?

• Unsa ka luwas ang imong gibati?

• Unsa ka luwas ang uban sa imong palibot?

• Kinsa pa ang imong gisultihan mahitungod niini (sama sa pamilya, mga ginikanan, mga lider sa Simbahan, o sibil nga mga awtoridad)?

• Unsa ang dinalian nimong mga panginahanglan?

• Aduna pa bay lain mahitungod niini nga abuso nga kinahanglan nakong mahibaloan?

Ang mga biktima sa pag-abuso tingali mangita og tabang gikan sa mga lider sa Simbahan alang sa espirituhanong pagkaayo. Ang kababayen-an ug kabatan-onan tingali mobati og kakomportable sa pakigkita sa bishop o sa ubang mga lider kon sila adunay higala, ginikanan, o kasaligan nga lider sa Simbahan. Isiguro nga ang biktima nahibalo nga adunay usa ka tawo nga makasuporta kaniya.

Samtang ikaw mohatag og tabang o suporta sa biktima, ikonsiderar ang mosunod nga mga sugyot. Hinumdumi ang kalooy ug kamahigugmaon diha sa imong mga sugyot.

Tabangi ang tawo sa pagsabot unsaon sa pag-angkon og pagkaayo pinaagi sa Manluluwas ug sa Iyang Pag-ula (tan-awa sa Alma 7:11–12; 2 Nephi 9:21; Doktrina ug mga Pakigsaad 88:6).

Dayega siya tungod sa pagpakita og kaisog sa pagsulti mahitungod sa pag-abuso.

Ipaniguro sa biktima nga dili siya kinahanglang maghinulsol sa pagkahimong biktima sa pag-abuso.

Awhaga ang tawo sa pagpangayo og panalangin sa pagkapari.

Kinahanglan nga ikaw sensitibo sa kaugalingong proseso sa pagkaayo sa biktima, nga mahimong molungtad og taas-taas nga panahon. Ayaw pagdali-dali o diktahi ang proseso.

Tugoti ang biktima sa paghunahuna sa kaugalingon niyang mga pagbati ug mga hagit nga may kalabotan sa pag-abuso sa dili pa motambag sa tawo mahitungod sa pagpasaylo sa tawong nakasala.

Tabangi ang tawo nga mobati nga luwas.

Tan-awa ang artikulo nga “Unsaon Ko nga Magpabiling Luwas?” alang sa dugang nga impormasyon.

Awhaga ang biktima sa pag-adto sa uban nga iyang kasaligan alang sa tabang ug suporta, lakip ang pagpatambag sa mga propesyonal kon gikinahanglan.

Ang pag-abuso makaapekto sa mga sakop sa pamilya ingon man sa indibidwal. Tinoa ang nahimong epekto diha sa kapikas sa maong indibidwal o pamilya ug sulbara kana nga mga problema. Sama sa imong pagpakita og gugma ug kabalaka sa biktima, isiguro ang pagpakita og gugma ug kabalaka alang sa mga sakop sa pamilya kinsa tingali nagkalisod o gisakitan.

Ikonsiderar ang pag-acces sa mga kapanguhaan sa komunidad o propesyonal nga tabang alang sa mga sakop sa pamilya kinsa tingali magkinahanglan og tambag o suporta.

Tabangi ang mga sakop sa pamilya sa pagsabot kon sa unsang paagi ang Manluluwas makatabang kanila nga mamaayo sa personal nga paagi (tan-awa sa Alma 7:11 ug sa Mateo 11:28–30).

Ihatag ang padayon nga suporta ngadto sa pamilya sa biktima.

Kon ang naabuso nga indibidwal mohatag og pagtugot nga hisgutan ang sitwasyon ngadto sa uban, lihoka ubos sa direksyon sa bishop aron makapangita og mga lider sa ward o ubang kasaligan nga mga indibidwal kinsa makahatag og padayon nga suporta, giya, ug tabang. (Tan-awa sa “Pagpugong ug Pagtubag sa Pag-abuso” nga outline sa instruksyon alang sa dugang nga impormasyon.)

Hisguti kauban sa bishop kon unsaon sa pagsuporta ang indibidwal o pamilya ug kon unsaon sa pag-atubang sa positibong mga paagi ang sitwasyon.

Tabangi ang biktima sa pagpangita ug sa pagkontak sa anaa nga mga kapanguhaan o propesyonal nga tabang. Tan-awa sa “Kinahanglan ba akong mokuha og propesyonal nga tabang?”

• Ang mga kapanguhaan tingali maglakip og mga kapuy-an, mga magtatambag, serbisyong medikal, sebisyong legal, ug ubang mga suporta.

• Depende sa kagrabe sa sitwasyon ug ubang konsiderasyon, ang tawo posibling magkinahanglan nga mokonsiderar sa paglakip sa sibil nga mga awtoridad o pagkuha og legal nga proteksyon.

Pagmainampoon ug magmahimong sensitibo mahitungod sa mga panginahanglan sa biktima ug mahitungod kon si kinsay i-assign isip tigpangalagad nga mga sister ug mga brother. Ikonsiderar ang pagpaapil sa biktima diha sa pagdesisyon kon angay. Ang ubang mga biktima tingali mas komportable sa usa ka tigpangalagad nga magtiayon kay sa duha ka tigpangalagad nga mga brother.

Ikonsiderar ang pagpakigtambayayong sa bishop aron makagahin og panahon diha sa ward council o sa lain nga miting aron sa pagbansay og mga lider kon unsaon sa pagpugong ug pagtubag sa pagpang-abuso.

• “Pagpugong ug Pagtubag sa Pag-abuso” nga dokumento sa kapanguhaan