Pag-abuso (Mga Gikinahanglan sa Nakasala)

Ang mga Bishop, mga presidente sa branch, ug mga presidente sa stake kinahanglan nga manawag dihadiha dayon sa eklesyastikal nga help line [numero nga tawagan alang sa tabang] sa Simbahan sa matag higayon nga may nahibaloan sila bahin sa abuso. Kini nga kapanguhaan naghatag og ayuda sa pagtabang sa mga biktima ug sa paghimo sa mga rekisito sa pag-report. Adto sa Mga Numero sa Help Line alang sa tabang sa numero sa help line ug sa dugang nga impormasyon.

Kinahanglan gayud nga walay lider nga mobaliwala sa usa ka report sa pag-abuso o motambag og usa ka indibidwal sa dili pag-report sa kriminal nga kalihokan.

Sa mainampoong paagi ikonsiderar ang pagpangutana og sama niini aron matabangan ka sa pagsabot og maayo sa problema sa maong tawo ug sa iyang kaandam ug kadasig sa paghinulsol.

• Pwede bang tabangan ko nimo sa pagsabot sa sitwasyon?

• Unsa ka importante alang nimo ang paghinulsol?

• Giunsa nimo sa paggamit ang mga baruganan sa ebanghelyo sa pagbuntog sa mapang-abuso nga mga kalagmitan ug mga kinaiya?

• Unsa may andam nimong buhaton aron sa pag-usab?

• Sa unsang paagi ako makatabang nimo sa proseso sa paghinulsol?

• Aduna pa bay lain mahitungod niini nga abuso nga kinahanglan nakong mahibaloan?

Samtang magtambag ka sa maong tawo, ikonsiderar ang paggamit og pipila sa mosunod nga mga sugyot:

Hisguti uban sa maong tawo ang mga sangputanan sa mapang-abuso nga kinaiya diha sa kaugalingon ug sa pamilya, lakip ang doktrina ug mga polisiya sa Simbahan nga may kalabotan sa pag-abuso. (Ribyuha ang mga kapanguhaan diha sa Polisiya ug mga Pagtulun-an sa Simbahan alang sa dugang nga impormasyon.)

Tabangi ang maong tawo sa pagpangita og paglaum ug pagkaayo pinaagi ni Jesukristo ug sa Iyang Pag-ula.

Sa mga kaso sama sa pisikal o gilitok [verbal] nga pag-abuso, tabangi ang maong tawo sa pagpangita og maayo, dili mapang-abuso nga mga paagi sa pagtubag sa lisod nga mga sitwasyon o mga pagbati, sama sa mosunod:

• Mogahin og igong panahon nga ang mga gibati mahupay ug matugotan ang mabuot nga pagsanong pinaagi sa, sama pananglit sa paglakaw-lakaw, pagginhawa og lawom, pag-ihap og kutob sa 100, o pagtrabaho sa usa ka proyekto.

• Mopaambit sa mga problema sa kalma nga paagi nga walay pagpanaway.

• Mogahin og panahon nga ikonsiderar ang mga hunahuna ug mga pagbati sa uban.

Ang pag-abuso makaapekto sa mga sakop sa pamilya ingon man sa indibidwal. Tinoa ang nahimong epekto diha sa kapikas sa maong indibidwal o pamilya ug sulbara kana nga mga problema. Samtang gikinahanglan ang pagtabang sa nakasala sa iyang proseso sa paghinulsol, usahay ang mga biktima mobati nga gibaliwala kon makita nga ang unang pukos sa mga lider mao ang pagtabang sa nakasala. Susiha ang biktima sa regular nga paagi sa pagsiguro nga ang iyang mga panginahanglan nakab-ot usab.

Gamita ang mga kapanguhaan sa komunidad o propesyonal nga tabang alang sa mga sakop sa pamilya kinsa tingali nagkinahanglan og tambag o suporta.

Tabangi ang mga sakop sa pamilya sa pagsabot kon sa unsang paagi ang Manluluwas makatabang kanila nga mamaayo sa personal nga paagi (tan-awa sa Alma 7:11 ug sa Mateo 11:28-30).

Paghatag og padayong suporta ngadto sa uban diha sa pamilya nga tingali posibling maapektuhan.

Pangayo og pagtugot sa maong indibidwal sa dili pa hisgutan ang sitwasyon ngadto sa uban. Ang mga bishop kinahanglan nga mokonsulta sa help line alang sa abuso kon adunay mga pangutana nga motumaw mahitungod sa pagkakompidensyal ug katungdanan sa pagpanalipod.

Tabangi ang maong tawo sa pagpangita ug pagkuha og propesyonal nga tabang, kon gikinahanglan.

• Gamita ang lokal nga mga kapanguhaan nga naghatag og mga serbisyo nga nahiuyon sa mga baruganan sa ebanghelyo.

• Kontaka ang lokal nga Family Services o ang opisina sa area alang sa dugang nga mga kapanguhaan o mga opsyon sa pagpanambag.

Ikonsiderar ang pagpakigtambayayong sa bishop aron makagahin og panahon diha sa ward council o sa lain nga miting aron sa pagbansay og mga lider kon unsaon sa pagpugong ug pagtubag sa pagpang-abuso.